© Hmuntha. All Rights Reserved 2023.
Website ih Tumtah
A hmaisabik ah himi website cangsuak thei dingih khuakhannak hlawhtling tertu Pathian sunglawi seh. Khuapi ulenau tampi ram harsatnak ruangah le khawvel a thangsotuk ih ruangah ramdang fehsuak in mah le tulhai danih zirin hmun dangdang ah kan tthekdarkaw thluh. Kan umnak ram le hmunah khua kan va-sa tikah kan khua thuanthu hi kan santhar no-nawn pawl tla in siseh, khua thuanthu cabu a rak siarngah hrihlo tupawl tla in internet ih awlsam-te ih an siar ih suahsemnak khua te an theih ringringnak hrang tumtahmi a si. Cumi hleiah,Cahram a phunphun, santhar fimthiamnak lam tiangih kan theihmipawl hlawmawk theinak ding hrang tiang tumtah a si. Khua a rak din ihsin kum 50 sung khua a rak dinso vivo dan record tha a umlo nan, Golden Jubilee cabu ah hin khawtlang rinsan mi pawl in an hmuh ban cincin khawlkhawm in kimcangzet in an ngan tikah Hmuntha khua a ra dinsuak vivo dan pawl mitthlam in kan hmu thei. Cumi cun kan khua thuanthu hi kilhim tu a tul timi cu zokhal in kan fiang zet ding. Cumi thinlung cun khua thuanthu ziangtin kilhim/kilkhawi dan ding timi khuaruahnak thar a sersuak. Pathian ih lamhruainak le hmuhter mi a si tiah ruat in, kan san thawn a fehtlang rero mi internet san ah website tuah in kan khua thuanthu cu kan umnak hmun le ram tin ihsin awlsamten phone, tablet le computer thawn siartheih ding in tawlrel a si. Website sungah Golden Jubilee cabu sungih cahram pawl anmah le an cahram ih zir in tthenhran an siih, awlsam ten Website sungah kan hawl thei dingih, siar theih a si ding. Santiluan ih zirin kan zirawk a tul vivo, tuisan ahcun website hi thulu ‘topic’ ih a tlangpi thu pawl le ziangtik caan khal ah mahte ih kan va siar le theihtheinak a siih Hmunttha khau thuanthu theihban cin cu website sungah ngan ttheh asi. Hmailam caan ahcun Hmuntha khua ih kan khawsatdan, tlanglengdan le kan pawlkomawk dan kau sinsin in siar ding a um ding tiah ruahsan asi. Website hman daan ah harsatnak nei kan umle ( help) timi ah hmet in a hmandan, register dan le login dan, cuhleiah bulpak ih ca-thlah daan le website hmandanah harsatnak a umpang le admin@hmuntha.com ah cakuat theih asiih, nazi 24 sungah tifel asi ding
Ruahsan
Theitawp suah in hmainawr aw, Ruahsan mi cu mah ih va lak a tul.
Tumtah
Kan tumtahmi kan thleng theinak nai bik cu kan tuah ringring nak hin a si.
Thlengawk
Khawvel thleng danglam ding cun kan mah kan thlengawk hmaisa a tul.
Pumkhatnak
Lungrualnak hi hmunkhat ih umkhawm kan si nak, kan nunphung le santiluan hluan in kan thansonak ah a thupibik mi karbak asiih rampi pakhat hrang tiang hmanah ttanrualnak hi a thupibik miangmo mi a si. Lungrualnak kan ti tikah ka ttuantlangnak hi a siih cui ttuantlangnak cun pumkhat kan sinak a langter ih pumkhat kan sinak cun thazangthar hmailam kan tumtahmi hrang cak sinsin ih kan ttuantlang theinak dingah a sersuak a si. Hmuntha khua cu kan lung a rual ih, pakhat le pakhat kan duhdawt aw hleiah lungawi um zet mi cu ramleng um khuapi unau kan zate’n kan Hmuntha khua te hngilh sianglo’n kan sopso ringring nak te hi a si. Pathian in in zangfahih Hmuntha khua laicin senpi te cu siat kan ton ah siseh / lungawinakah siseh kan theihpiawton ih zawnruahawktawn thiam zet kan si. Hmailam caan ah khuapi u le nau kan zaten lungrual te ih ke kan kartlang vivo thei nak ding hrang pehtlaihnak tha kan ttul a si. Ziangtin khua a thangso vivo ding ih ziangvek in Hmuntha khua in hmailam ah cak sinsin ih a thanso theidan ding tiih kan ruahdaan cio Hmuthan website ah pehtlaiaw khawm in kan pumkhatnak ti lang cio uhsi.
1999 Bawhlungsit
CHAMPION
First Hlir 1999
Cup lak tam bik kum 1999 ah first hlir rak lak mi khua a si. A tuisan thangthar no nawn suakthuan pawl khal kan thlennak hmun leh ramah bik ih bik si ringring ding in kan thanso theinak dingah tumtahnak tumpi nei in hi mi website hi tuahsuak a si. Mi dang thin nuamlo tertu, mi dang thansonak daltu siloin kan khua mi le sa hmunkhat ah theimi, neihmi, thiammi pawl hlawm aw khawm ding hi kan tumtahmi tumbik a si.
